រូបមន្តពិសេស 3 ចំនុចដើម្បីក្លាយជាអ្នកផលិតវីដេអូ - 3 Steps to be a Video Producer

ដោយសារតែបច្ចុប្បន្នគឺជាសម័យឌីជីថល ហេតុនេះវិស័យផលិតវីដេអូផ្សព្វផ្សាយតាមរយៈអនឡាញបានរីកដុះដាលយ៉ាងច្រើនគួរឲ្យកត់សំគាល់។ មានមនុស្សជាច្រើនបានប្រឡូកចូលក្នុងវិស័យនេះ គឺដើម្បីរកចំនូលពីការផ្សព្វផ្សាយតាមរយៈអនឡាញ ជាពិសេសVloger ដែលក្នុងនោះក៏មានការផលិតជាវីដេអូខ្លីវែង វីដេអូឯកសារ ឬវីដេអូផ្សព្វផ្សាយសំរាប់ស្ថាប័នមួយចំនួន ។​ បទពិសោធន៍ក្នុងការផលិតវីដេអូនេះ បងប្អូនខ្លះក៏មានច្រើន ខ្លះមានតិច ខ្លះទៀតក៏ស្ទើរតែគ្មាន ប៉ុន្តែអ្នកទាំងអស់គ្នានៅតែអាចធ្វើបាន គ្រាន់តែគុណភាពដែលទទួលបានគឺផ្សេងៗពីគ្នា។ ទាំងនេះគឺអាចកើតឡើងបានដោយអាស្រ័យទៅលើចំណេះដឹង ទេពកោសល្យ​​ បទពិសោធន៍ បូករួមជាមួយចិត្តស្រលាញ់ តស៊ូ អត់ធ្មត់ និង ជំនាញទំនាក់ទំនងដែលមិនអាចខ្វះបាន។

ការផលិតវីដេអូគឺមានន័យថា ការបំលែងពីអត្ថបទ ការសរសេរ​ ការនិពន្ធ គំនិតយោបល់ ឬ ការស្រមើស្រម៉ៃ ឲ្យក្លាយចេញជារូបរាងនៃរូបភាពដែលមានចលនាឬកាយវិការដែលអាចមើលឃើញ សំលេងដែលអាចស្តាប់លឺ និង យល់ច្បាស់អំពីអត្ថន័យ ។

ការផលិតវីដេអូដ៏ល្អឥតខ្ចោះមួយគឺវាមិនមែនជាការងាយស្រួលនោះទេ ប្រសិនបើយើងមិនបានសិក្សាស្វែងយល់អំពី​ ៣​ ចំនុចដ៏សំខាន់បំផុតក្នុងការផលិត។ បើយើងមិនបានដឹងអំពី ៣ ចំនុចសំខាន់នេះទេ នោះអ្វីដែលអ្នកទទួលបានគឺវីដេអូដែលគ្មានគុណភាព ខ្ជះខ្ជាយថវិកា និង ខាតបង់ពេលវេលា។

ថ្ងៃនេះខ្ញុំសូមចូលរួមចែករំលែកនូវ ៣ ចំនុចដើម្បីក្លាយជាអ្នកផលិតវីដេអូដែលទទួលបានទាំងគុណភាព ចំនេញទាំងពេលវេលា និង ថវិកា

• ចំនុចទី1 ការរៀបចំគំរោងមុនពេលផលិត (Pre-Production)

• ចំនុចទី2 កំឡុងពេលផលិត (Production)

• ចំនុចទី3 ការកាត់ត ឬ រចនាវីដេអូ (Post-Production)

ចំនុចទី1 ការរៀបចំគំរោងមុនពេលផលិត (Pre-Production)

I. ការធ្វើ Pre-Production និង ការគ្រប់គ្រងចំណាយ

1. ជួបពិភាក្សា​ សិក្សា និង កត់ចំណាំអំពីគោលបំណងធំៗដែល Client ចង់បាន

2. កត់ចំណាំនូវរាល់តម្រូវការចាប់តាំងពីពេលចាប់ផ្តើមរហូតដល់បញ្ចប់

3. សិក្សាអំពីថវិកាដែលត្រូវចំណាយទាំងស្រុង និង ធ្វើបញ្ជីចំណាយទៅឲ្យ Client

4. បន្ទាប់ពីClient យល់ព្រមព្រៀងជាមួយតម្លៃ យើងត្រូវធ្វើការចុះហត្ថលេខាលើកុងត្រា និង ទទួល ថវិកា៥០ភាគរយមុនធ្វើការផលិត

II. រៀបចំគំរោងការផលិត ការសសេរសាច់រឿង និង ការគូសរូបភាពពណ៌នាអំពីសាច់រឿង

1. រៀបចំបង្កើត ឬ សរសេរឆ្អឹងរឿង យ៉ាងហោចណាស់ឲ្យបានចំនួន១០

2. បង្ហាញឆ្អឹងរឿងទៅកាន់Client (បង្ហាញចំនួន២ទៅកាន់Client ប្រសិនបើClientមិនពេញចិត្តឆ្អឹងរឿងទាំង២យើងនឹងមានឆ្អឹងរឿងទី៣ដើម្បីបង្ហាញគាត់)

3. បង្កើត និង បំបែកសាច់រឿងឲ្យបានត្រឹមត្រូវ និង ល្អបំផុត

4. គូសរូបភាពពណ៌នាអំពីសាច់រឿង បង្ហាញទៅ Client និងក្រុមការងារ ដើម្បីឲ្យងាយស្រួលយល់

5. ធ្វើការជួលក្រុមការងារដែលពាក់ព័ន្ធនឹងការផលិត

6. កំណត់កាលវិភាគផលិត

III. ការចុះទៅសិក្សាអំពីទីតាំង

1. កុំប៉ាន់ស្មានអំពីទីតាំង ប្រសិនបើមិនដឹងព័ត៍មានណាមួយត្រូវស៊ើបសួរអ្នកនៅក្បែរនោះ

2. ធ្វើការសិក្សាអំពីទីតាំងឲ្យបានច្បាស់លាស់ដូចជា បរិយាកាស សំលេងរំខាន ប្រព័ន្ធភ្លើងឬទឹក បន្ទប់ទឹកសំរាប់ក្រុមការងារ កន្លែងសម្រាក សន្តិសុខសុវត្ថិភាព បណ្ណអនុញ្ញាតចុះថត បង្ហោះដ្រូន ជាពិសេសត្រូវផ្តិតយកនូវរូបភាពគ្រប់ទីតាំងដែលបានចុះទៅ

IV. ក្រុមការងារផលិត

1. ចំនួនក្រុមការងារដែលត្រូវការ

2. តើអ្នកគួរតែស្វែងរកក្រុមការងារតាមវិធីណា (អាចតាមបណ្តាញសង្គម អ្នកស្គាល់គ្នា ឬ តាមក្រុមហ៊ុនណាមួយ)

3. ត្រូវប្រាកដថាក្រុមការងារបានត្រៀមសំលៀកបំពាក់ និង សំភារៈប្រើប្រាស់សំរាប់ខ្លួនឯងឲ្យបានគ្រប់គ្រាន់

4. វិធីសាស្រ្តទំនាក់ទំនងជាមួយក្រុមការងារកំឡុងពេលផលិត

5. មុនពេលសម្រេចចិត្តធ្វើអ្វីមួយ ត្រូវតែធ្វើការពិភាក្សាជាមួយក្រុមការងារជាមុនសិន

V. រើសតួសម្តែង

1. ត្រូវមានក្រុមការងារម្នាក់ដែលមានបទពិសោធន៍ក្នុងការរើសតួសម្តែង (Casting Director)

2. ធ្វើការសហការជាមួយភ្នាក់ងារគ្រប់គ្រងតួសម្តែងណាមួយ​ដើម្បីធ្វើការជ្រើសរើសតួដោយខ្លួនឯង

3. ឲ្យពួកគេបង្ហាញព័ត៍មានអំពីខ្លួនឯង

4. សួរពួកគេអំពីភាពយន្ត ម្ហូបអាហារ និង កីឡាដែលគេចូលចិត្ត

5. ឲ្យសាច់រឿងភ្លាមៗទៅពួកគេដើម្បីសម្តែងដោយមិនប្រាប់មុន ដើម្បីចង់ដឹងពីការចងចាំរបស់ពួកគេ

VI. កាលវិភាគសំរាប់ការផលិត

1. ចំណាយពេល១ ឬ ២ម៉ោងជាមួយ Client ដើម្បីធ្វើការទៅលើសាច់រឿង

2. បញ្ជាក់ជាមួយClientថាតើពួកគេត្រូវការទាំងសាច់រឿង និង storyboard

3. មិនមែនគ្រប់ការងារសុទ្ធសឹងតែត្រូវការ Script and Storyboard ពេលខ្លះយើងគ្រាន់តែកត់ចំណាំចំនុចសំខាន់ក៏បាន

4. ធ្វើការបំបែកកាលវិភាគផលិតឲ្យបានត្រឹមត្រូវ

VII. កាលវិភាគសំរាប់ការកាត់ត ឬ រចនាវីដេអូ

1. ត្រៀម Hard Disk សំរាប់ស្តុកទិន្នន័យវីដេអូ​នៅពេលថត

2. កំនត់ពេលវេលាឲ្យបានជាក់លាក់ ប្រសិនបើមានការររចនាប្លង់3D ឬ ធ្វើAnimationផ្សេងៗ

3. ស្វែងរកបទភ្លេង និង អ្នកបញ្ចូលសំលេង

4. គោលបំណងនៃការប្រើប្រាស់វីដេអូ(សំរាប់រោងកុន ទូរទស្សន៍ ឬលើបណ្តាញសង្គម)

5. រៀបចំលក្ខខណ្ឌសំរាប់ Client ក្នុងការកែប្រែកំឡុងពេលកាត់ត

ចំនុចទី2 កំឡុងពេលផលិត (Production)

I. ការងាររបស់អ្នកគ្រប់គ្រងក្នុងពេលធ្វើការផលិត

1. ធ្វើការសម្រេចចិត្តទៅលើការងារទូទៅក្នុងពេលផលិតឲ្យសមស្របទៅនឹងការចំណាយដែលបានគ្រោងទុក

2. គ្រប់គ្រងទៅលើការផលិតទាំងមូល

3. អ្នកត្រូវតែជាអ្នកសម្រេចចិត្តចុងក្រោយ

4. គ្រប់គ្រងក្រុមការងារឲ្យបានល្អ

5. ត្រួតពិនិត្យទៅលើសកម្មភាពពេលវេលា ការទទួលខុសត្រូវរបស់ក្រុមការងារ

6. មានដំណោះស្រាយរាល់ពេលមានបញ្ហា

II. អំពីទីតាំង

1. តើទីតាំងរបស់យើងមានសុវត្ថិភាពគ្រប់គ្រាន់ក្នុងការថែទាំឧបករណ៍ឬនៅ?

2. តើទីតាំងនៅជាអគារជួល ទីសាធារណៈ ឬ ស្ទូឌីយ៉ូ

3. យើងត្រូវថែរក្សាទីតាំងថត ឲ្យដូចជារបស់យើង

III. សកម្មភាពដែលចាំបាច់ធ្វើ

1. បង្ហាញអំពីការទទួលខុសត្រូវរបស់ក្រុមការងារនិមួយៗ

2. បង្ហាញអំពីទីតាំងនិងស្ថានភាពដែលត្រូវចុះថតក្នុងថ្ងៃនិមួយៗ ដើម្បីឲ្យក្រុមការងារបានត្រៀមខ្លួន

3. កំនត់និងបញ្ចាក់ម៉ោងពេលវេលាជួបជុំឲ្យបានច្បាសលាស់

4. ខលទាក់ទងក្រុមការងាររនិមួយៗឲ្យបានមុនម៉ោង

5. ត្រូ​វប្រាកដថាក្រុមការងារនិមួយៗបានយល់ច្បាស់អំពីការងារទទួលខុសត្រូវរបស់ខ្លួន

6. កុំស្តីបន្ទោសក្រុមការងារពេលពួកគាត់ធ្វើខុសអ្វីមួយ ទុកការងារនេះឲ្យអ្នកដឹកនាំជាអ្នកពន្យល់ណែនាំ

7. រៀបចំ Monitor សំរាប់ Client មើល

IV. ត្រៀមប្រាក់កម្រៃសម្រាប់ក្រុមការងារ

1. ធ្វើយ៉ាងណារក្សាកិត្តិយសជាមួយក្រុមការងារ ជៀសវាងការជំពាក់លុយសម្ព័ន្ធភាពក្រុមការងារ

2. ត្រូវប្រាកដថាយើងមានលុយគ្រប់ចំនួនដើម្បីឲ្យក្រុមការងារមុនពេលចាប់ផ្តើម

3. ការទូរទាត់ថវិកាពី Client ត្រូវបែងចែកជាបីដំណាក់កាល

4. ទូរទាត់ថវិកាមុនចាប់ផ្តើមការងារ

5. ទូរទាត់ថវិកានៅពេលមានការបន្ថែមទៅលើចំនុចណាមួយក្នុងពេលធ្វើការងារ

6. ទូរទាត់ថវិកាមុនពេលប្រគល់វីដេអូសម្រេច

7. ត្រូវតែទូទាត់ថវិកាលុយពី Client ឲ្យបានមុនពេលផលិត និង គ្រប់គ្រាន់ត្រៀមសំរាប់ក្រុមការងារ។ ប្រសិនបើមិនបានការទូទាត់លុយមុននោះទេ នោះមិនអាចធ្វើការផលិតបានជាដាច់ខាត

ចំនុចទី3 ការកាត់ត ឬ រចនាវីដេអូ (Post-Production)

I. ធ្វើការផ្តល់ព័ត៍មាន និង ពិភាក្សាជាមួយក្រុមកាត់ត

1. ត្រូវប្រាកដថាក្រុមកាត់តបានយល់ច្បាស់ឯកសារ ឬ ទិន្នន័យដែលយើងបានប្រគល់ជូន

2. ធ្វើការពន្យល់ណែនាំអំពីឯកសារ ឬ ទិន្នន័យ និង ឆ្លើយតបនូវរាល់សំនួររបស់ក្រុមកាត់តឲ្យបានត្រឹមត្រូវ រហ័ស និង ច្បាស់លាស់

3. ផ្តល់នូវរាល់ឯកសារពាក់ព័ន្ធ និង ចាំបាច់ដែលមាន

4. បង្ហាញឲ្យក្រុមកាត់តយល់ថាបទភ្លេងប្រភេទអ្វីដែលសាកសមនឹងប្រើក្នុងការកាត់តវីដេអូ

5. ត្រូវប្រាកដថាក្រុមកាត់តបានយល់ច្បាស់អំពីគោលបំណងនៃការកាត់តវីដេអូ

6. ស្តាប់យោបល់របស់ក្រុមការងារកាត់ត

7. ប្រសិនបើយល់មិនអំពីការងាររបស់ក្រុមកាត់ត ស្នើរសូមឲ្យគេពន្យល់

8. មិនគួរបង្ហាញ Client នូវវីដេអូក្នុងដំណាក់កាលទី១ ( Rough Cut )

II. ដំណាក់កាលកែតម្រូវ

1. ការកាត់តគឺចែកចេញជាបីដំណាក់កាល

2. Rough Cut គឺដំណាក់កាលកាត់តប្លង់នីមួយៗឲ្យបានត្រឹមត្រូវទៅតាមសាច់រឿង

3. Final Rough Cut គឺដំណាក់កាលរចនាGraphic និង animation និងបញ្ចូលនូវរាល់ Element ផ្សេងៗ

4. Picture Locked គឺដំណាក់កាលកែពណ៌ និង បញ្ចូលសំលេង

VI. យកចិត្តទុកដាក់ចំពោះភ្ញៀវ

1. ណែនាំឲ្យក្រុមការងារកាត់តគោរព និង គួរសមទៅកាន់ភ្ញៀវ។ ពួកគេមិនអាចធ្វើការទាក់ទងផ្ទាល់ជាមួយភ្ញៀវនោះឡើយ ដែលជាហេតុធ្វើឲ្យប៉ះពាល់ដល់ពេលវេលាកំណត់

2. ក្រុមកាត់តត្រូវតែជួយដាស់រំលឹកភ្ញៀវឲ្យធ្វើការជជែកពិភាក្សាជាមួយអ្នកផលិតជាមុនសិន

3. ក្រុមការងារកាត់តត្រូវតែរាយការណ៍នូវរាល់សំនួរ និង មតិយោបល់របស់ភ្ញៀវទៅកាន់អ្នក

4. ដាក់Watermarkជាប់ជាមួយវីដេអូ

5. ពេលខ្លះអ្នកគួរតែធ្វើការកែតម្រូវតាមការស្នើសុំរបស់ភ្ញៀវ បើភ្ញៀវពេញចិត្ត ឬសប្បាយ ថ្ងៃក្រោយពួកគេនឹងមានការងារជាមួយអ្នកជាបន្តបន្ទាប់ទៀត

6. អ្នកមិនអាចអនុញ្ញាតឲ្យភ្ញៀវធ្វើការកែតម្រូវច្រើនលើកច្រើនសារគ្មានការកំណត់នោះទេ

7. អ្នកគួរតែផ្តល់ជូនភ្ញៀវនូវចំនួនច្បាស់លាស់នៃការកែតម្រូវ

8. ប្រសិនបើពួកគេធ្វើការកែតម្រូវលើសពីចំនួនកំណត់ នោះអ្នកត្រូវតែគិតលុយបន្ថែមពីពួកគេ

III. វិធីធ្វើកែតម្រូវឲ្យមិនឲ្យអ្នកកាត់តវង្វេងវង្វាន់

1. ពួកគេជាមនុស្សមិនមែនជាម៉ាស៊ីន

2. យកចិត្តទុកដាក់ពេលត្រួតពិនិត្យមើលវីដេអូ មិនត្រូវធ្វើការងារច្រើនក្នុងពេលតែមួយ

3. ពេលចង់កែតម្រូវត្រង់ចំនុចណាមួយអ្នកត្រូវតែកត់បង្ហាញនូវលេខវិនាទីនោះឲ្យបានច្បាស់លាស់នៅលើឯកសារ(ឧទាហរណ៍៖ ត្រង់ចំនុច នាទីទី២ វិនាទីទី១)

4. បញ្ចាក់ឲ្យបានច្បាស់ពីចំនុចដែលត្រូវកែ ថាមូលហេតុអ្វី?

5. ពិនិត្យមើលគ្រប់វីដេអូដែលបានថតរួច

6. កុំឲ្យក្រុមកាត់តចំណាយកាត់ ប្រសិនបើអ្នកគង់តែប្តូរប្លង់ដដែល

7. ឲ្យពួកគេធ្វើកាត់តដោយប្រើប្រាស់ជំនាញ និង ទេពកោសល្យរបស់គេឲ្យអស់ពីសមត្ថភាព កុំរំខានពួកគេ ឬ បង្អាក់ពួកគេ

សូមចុច Subscribe Channel ដើម្បីទទួលបានចំណេះដឹង និង ការកំសាន្តថ្មីៗ

Link: https://www.youtube.com/channel/UCOpPFrkDNMkPGPy_mttoIow

សូមអរគុណ !